Back

دلاوەر عەلائەددین

سەرۆکی دامەزرێنەری ئینیستیتیوتی ڕۆژهەڵاتی ناوەڕاست بۆ توێژینەوە (مێری) و وەزیری پێشووی خوێندنی باڵا و توێژینەوەی زانستی لە حکومەتی هەرێمی کوردستان (٢٠٠٩ بۆ ٢٠١٢)، پرۆفیسۆری پزیشکی لە زانکۆی نۆتینگهام لە شانشینی یەکگرتوو.

پرۆفیسۆر دلاوەر عەلائەدین لە هەرێمی کوردستانی عێراق لە دایک بووە و گەشەی کردووە و پزیشکی لە بەغدا خوێندووە و پاشان خوێندنی باڵای (ماستەر، دکتۆرا و زەمالەی پزیشکی) لە لەندەن شانشینی یەکگرتوو تەواوکردووە. ئەندامی ئەنجوومەنی توێژینەوەی پزیشکی بووە بەر لە دامەزراندنی وەک پزیشکی ئەکادیمی لە زانکۆی نۆتینگهام لە ١٩٩٤. ژمارەیەک پۆستی کارگێڕی و جێبەجێکاری بەرزی لە ئەستۆگرتووە لە چەندین دامەزراوەی نیشتمانی، کۆمەڵەی پزیشکی لە شانشینی یەکگرتوو لە نێویاندا کۆلیژی شاهانەی پسپۆری زانستی نەخۆشییەکان، ئەنجوومەنی توێژینەوەی پزیشکی و ئاژانسی پاراستنی تەندروستی و کۆمەڵەی گشتی گیانەورزانی ورد (بایۆلۆژی ورد). چەندین توێژینەوەی زانستی لە گۆڤاری ئەکادیمی نێودەوڵەتی بڵاوکردۆتەوە و چەندین کتێبی لە بواری پزیشکی بە هاوبەشی نووسیوە.

هەروەها دامەزرێنەری هاوبەشی کۆمەڵەی زانستی و پزیشکی کوردی، دامەزراوەیەکی داکۆکیکارە لە مافەکانی مرۆڤ بۆ کورد و فشارخستنەسەر سیاسەتەکانی شانشینی یەکگرتوو و وڵاتە یەکگرتووەکانی ئەمریکا دەربارەی دۆزی کورد. پرۆفیسۆر دلاوەر عەلائەدین بەهەمان شێوە گرنگیداوە بە پرسی بەکارهێنانی چەکی کیمیاوی لە کوردستان بەشێوەیەکی ئەکادیمی و بەڵگەی زانستی لەسەر بەکارهێنانی چەکی کیمیاوی، لەهەڵمەتی پاکتاوی نەژادی کورد لە لایەن ڕژێمی پێشووی عێراق، بڵاوکردۆتەوە. هەروەها ئەندامی تیمی لێکۆڵینەوەی کیمیاوی و بایۆلۆژی بەریتانی بووە. بەشداربووە لە بەرهەمهێنانی چەندین بەڵگەفیلمی تەلەفزیۆنی و بڵاوکراوەکەی لە ژێرناوی 'هەوری مردن' لە تاوانبارکردنی ئەندامانی ڕژێمی پێشووی عێراق بەکارهێنراوە. پاشان هەڵساوە بە چاپکردنی بیرەوەرییەکانی ئەو چالاکیانەی کە بۆ فشارکردن تێیدا بەشداربووە لە ژێرناوی 'فشارکردن بۆ گەلێکی بێ وڵات' لە ٢٠٠٧.

پرۆفیسۆر دلاوەر عەلائەدین لە سەرەتای ١٩٩٢ تاوەکو ئێستا بەشداربووە لە پاڵپشتیکردنی پرۆژەکانی بنیاتنانی نەتەوە 'نیشتیمانسازی' و پەرەپێدانی تواناکان و لە ٢٠٠٩ لە کابینەی شەشەمی حکومەتی هەرێمی کوردستان، بەسەرۆکایەتی سەرۆک وەزیران دکتۆر بەرهەم ئەحمەد ساڵح، وەک وەزیری خوێندنی باڵا و توێژینەوەی زانستی (تاوەکو ٥ نیسانی ٢٠١٢) بەشداربووە.

لەم ماوەی کاریدا، بەرنامەیەکی پەرۆشی بۆ چاکسازی ڕیشەیی لە سیستەمی خوێندنی باڵا لە کوردستان دەستپێکرد بەئامانجی باشترکردنی کواڵیتی (جۆریی) خوێندنی باڵا و ڕاهێنان و ئامادەکردنی زانکۆکان بۆ سەربەخۆیی و تازەگەری لە توێژینەوە و چاکسازیکردن لە سیستەمی فەرمانڕەوایەتی بۆ بەدەستهێنانی دادپەروەری کۆمەڵایەتی و ڕەخساندنی دەرفەتی یەکسان و یەکسانی ڕەگەزیی. بەهەمان شێوە ڕابەرایەتی یەکەم پرۆگرامی زەمالەی خوێندنی تایبەت بە حکومەتی هەرێمی کوردستانی بەمەبەستی ناردنی هەزارەها قوتابی بۆ دەرەوەی وڵات بۆ خوێندنی ماستەر و دکتۆرا، کردووە. دواترێن کتێبی 'نیشتیمانسازی و سیستەمی فەرمانڕەوایەتی خۆماڵی لە هەرێمی کوردستان' تیشدەخاتە سەر ئەو ئاستەنگانەی کە ڕووبەڕووی حکومەتی هەرێمی کوردستان دەبنەوە و ئەو ئاراستانەی کە دەکرێت پەیڕەوبکرێن بۆ زاڵبوون بەسەریاندا.

Posts by دلاوەر عەلائەددین:

Publications by دلاوەر عەلائەددین: