کۆڕبەندی لێڤانت و عێراق: پلاتفۆرمێک بۆ هاوکاری ناوچەیی
لە نێوان ئالنگاریە بەردەوامەكانی کە ڕووبەڕووی ڕۆژهەڵاتی ناوەڕاست دەبنەوە، ئەو دەستپێشخەرییە فیکریانەی هەوڵدەدەن كە دیدێكی گەشبین بۆ ئاوەدانی و خۆشگوزەرانی ناوچەكە پێشكەش بكەن، گرنگییەکی سەرەکییان هەیە. بە درککردن بەم پێویستییە، دیداری مێری 2024 وەك دەرفەتێکدا بەکارهێنرا بۆ راگەیاندن و دامەزراندنی کۆڕبەندی لێڤانت و عێراق، بۆ لێكبەستنەوەی دامەزراوە بیرمەندە ناوچەییەکان وەك سەکۆیەک بۆ گفتوگۆ و هاوکاری و ئاوێتەكردنەوە خستویانەتە روو.
لە پانێلی راگەیاندنی كۆڕبەندەكەدا، دلاوەر عەلائەدین، سەرۆکی ئینستیتیوتی ڕۆژهەڵاتی ناوەڕاست بۆ توێژینەوە و رێكخەری دامەزرێنەر بۆ كۆڕبەندی لێڤانت و عێراق، چەمک و پەرەسەندنی بیرۆکەکانی پەیوەست بە دەستپێشخەریی كۆڕبەندەكەی ناساند. دواتر پانێلێكی دیبەیتی گەرم بەڕێوەچوو کە بەشداربووەكانی بریتی بوون لە:
- سەعید بەهاء ئەلمەسڕی، وەزیری پێشوو و نوێنەری شازادە ئەلحەسەن بن تەڵاڵ، ئوردن
- لوقمان فەیلی، باڵیۆزی عێراق لە ئەلمانیا
- عەممار قەحف، بەڕێوەبەری جێبەجێکاری سەنتەری عمران بۆ لێكۆڵینەوەی ستراتیژی
- هیوا عوسمان، میدیاكار، 964+ میدیا (دوێنەر).
لەم پانێڵەدا، تەرکیز خرایە سەر میکانیزمی کرداری بۆ نەهێشتنی ململانێ و دروستبوونی متمانە لە نێوان کۆمەڵگاکان و بڕیاردەران. هەر بۆیە بابەتی شەڕ و سەرچاوەکانی ململانێکان باس نەکران لەم پانێلەدا. ناوچەی لێڤانت و عێراق، کە سەردەمانێک ناوەندی شارستانییەت و پێکەوەژیانی تائیفی و خۆشگوزەرانی و ئابووریی گەشەسەندو بوو، ئێستا بەدەست پارچەپارچەبوون و پەرتەوازەی سیاسی و نالەباری ئابووری و تەحەددیاتی حوکمڕانییەوە دەناڵێنێت. ئامانجی ئەم پانێڵە داڕشتنی نەخشەڕێگایەک بوو بۆ ئەنجامدانی چاکسازی بەشێوازێک کە هاوکاری ناوچەیی، گەشەپێدانی ئابووری، باشترکردنی حوکمڕانی و بەهێزکردنی پەیونەدی کۆمەڵگای مەدەنی لەسەر ئاستی ناوچەک بکاتە پیشینە.
دلاوەر عەلائەدین، ناوچەی لێڤانت و عێراقی بە دەوڵەمەندترین مەنزڵگای کۆمەڵگە ئیتنۆ-ئاینییە هەمەچەشنەکانی جیهان وەسف کرد، كە بە قووڵی بەیەکەوە گرێدراون، بە شێوەیەکی ئاشتیانە پێکەوە ژیاون و بۆ هەزاران ساڵە میراتێکی کولتووری و مێژوویی هاوبەشیان هەیە. خەڵکی ئەم ناوچەیە لە سەرانسەری کەرتە کۆمەڵایەتی، سیاسی، ئابووری و ئەمنییەکاندا هاوبەشییەکی زۆریان هەیە. بەداخەوە لە ماوەی سەدەی ڕابردوودا ناوچەکە دووچاری دووبەرەکی و ململانێ و شەڕی وێرانکەری بوو كە بووە هۆی لاوازبوونی دەوڵەتەکان و زیاتر جەمسەرگیری و عەسكەرتاریەت و هەژاربوونی کۆمەڵگاکان. لەدەستدانی فرەییە دەوڵەمەندەكەی ناوچەکە بەهۆی سیاسەتی تائیفی، ئاوارەبوونی دانیشتووان و کۆچی بەرەو دەرەوە زۆر جێگەی نیگەرانییە. عەلائەدین پێیوابوو ئێستا کاتی ئەوەیە لە ململانێ تێپەڕین و ڕێگاکان بدۆزینەوە بۆ پەرەپێدانی گفتوگۆ و بوژانەوە و خۆشگوزەرانی لە سەرانسەری ناوچەکەدا. بۆیە كۆڕبەندی لێڤانت و عێراق بۆ بەشداریکردن و كارلێكردنی لایەنە پەیوەندیدارەکانە، لەوانەش داڕێژەرانی سیاسەت، سەرکردەکانی بۆچوون و خێرخوازان لە ئاستی نیشتمانی، ناوچەیی و نێودەوڵەتیدا بۆ ئاڵوگۆڕی بیرۆکە و گەڕان بەدوای دەستپێشخەرییەکاندا کە گفتوگۆی نێوان کۆمەڵگاکان، هاوکاری سنوور بەزاندن، وابەستەیی ئابووری و لە کۆتاییدا، یەکخستنەوەی ناوچەی لێڤانت و عێراق بەرەوپێش دەبەن.
مۆدێلی ئوردن
دکتۆر سەعید بەها ئەلمەسری، لە ئوردونەوە سڵاو و گوتەی پڕ لەحیکمەت و پشتگیری تەواوی شازادە ئەلحەسەن بن تەڵاڵی بۆ دەستپێشخەری كۆڕبەندی لێڤانت و عێراق گەیاند. ئەلمەسری تێڕوانینێکی پێشکەش کرد کە چۆن ئوردن سەرەڕای گێژاوی ناوچەکە سەقامگیری پاراستووە. ئەو ئەمەی بۆ سێ هۆکاری سەرەکی گەڕاندەوە: بەردەوامی دامەزراوەیی، داڕشتنی سیاسەتی ئابووری-مەركەزی، و بەڕێوەبردنی فرەجۆری لە ڕێگەی گشتگیرییەوە. ئوردن بە پێچەوانەی دراوسێکانیەوە سیستەمێکی حوکمڕانی جێگیر و گونجاوی پاراستووە کە پەرەی سەندووە بۆ ئەوەی بەرەوڕووی ئاستەنگە جیۆپۆلیتیکییەکان ببنەوە. پراگماتیزمی ستراتیژی پاشایەتی هاشمی ڕۆڵێکی گرنگی هەبووە لە دڵنیابوون لەوەی کە دامەزراوەکان سەرەڕای فشارە دەرەکییەکان بە کارایی و کاریگەر دەمێننەوە.
بە گوتەی ئەلمەسری، ئوردن لە سەردەمی شا عەبدوڵڵای دووەمدا گۆڕانکارییەکی بنەڕەتی لە ئەولەویەتەکانی حوکمڕانیدا بەخۆیەوە بینیوە، کە گەشەسەندنی ئابووری لە پێش مانۆڕی سیاسییەوە بووە. حکومەت سەرنجی لەسەر ڕاکێشانی وەبەرهێنان و بەهێزکردنی خۆڕاگری ئابووری و پەرەپێدانی سەقامگیری کۆمەڵایەتی لە ڕێگەی سیاسەتی ئابووری گشتگیرەوە بووە. توانای ئوردن بۆ هاوسەنگکردنی بەرژەوەندییە نەتەوەیی و تائیفی و سیاسییەکان یارمەتیدەر بووە لە پاراستنی ئاشتی ناوخۆیی. بەپێچەوانەی عێراق و سوریا کە دابەشبوونی تائیفی بووەتە هۆی سووتەمەنی ناسەقامگیری، ئوردن سیاسەتی میانڕەوی و یەکگرتنی نەتەوەیی گرتۆتەبەر.
نموونەی ئوردن و هاوشێوەی ئوردن گرنگی پراگماتیزمی ئابووری و دامەزراوە بەهێزەکان و حوکمڕانی گشتگیر لە دەستەبەرکردنی سەقامگیری درێژخایەندا دەردەخەن. بەڵام بە وتەی قسەکەران مۆدێلی ئوردن ڕاستەوخۆ ناگوازرێتەوە بۆ عێراق، سوریا، یان لوبنان، چونکە هەر وڵاتێک ڕووبەڕووی ئاستەنگی ناوخۆیی تایبەت بەخۆی دەبێتەوە.
ئالنگاریەكانی بەردەم عێراق
عێراق ئاستەنگی قووڵی حوکمڕانی و ئابوری زۆری هەیە کە بوونەتە ڕێگر لەبەردەم هەوڵەکانی ئاوەدانکردنەوە و چاکسازیی دوای ململانێکان. لوقمان فەیلی باڵیۆزی عێراق لە ئەڵمانیا – گەندەڵی سیستماتیکی و پەرتەوازەیی تائیفی و سیاسی و خراپ بەڕێوەبردنی ئابووری وەک بەربەستی سەرەکی بۆ چاکسازی دەستنیشان کرد. دەیان ساڵ لە گەندەڵی سیاسی و ناکارامەیی کارگێڕی، متمانەی گشتیی لەناوبردووە و دامەزراوەکانی دەوڵەتی لاوازکردووە. نوخبە سیاسییەکان بەرژەوەندی کەسی و کوتلەیی لە پێشینەی کارەکانیان دادەنێن و چاکسازییەکانی حوکمڕانی قورس دەکەن.
سیستەمی دابەشکردنی دەسەڵاتی تائیفی عێراق (پشک پشکێنە یان موحاسەسە) بووەتە هۆی داهێنانی ئیفلیجی سیاسەت، کە کوتلە ڕکابەرەکان ڕێگری لە چاکسازییە گرنگەکانی ئابووری و حوکمڕانی دەکەن. بە پێچەوانەی مۆدێلی حوکمڕانی ناوەندیانەی ئوردن، سیستەمی حکومڕانی عێراقی دابەشکراوە لەسەر ئاستی تائیفی و نەتەوەیی، ئەمەش ڕێگری دەکات لە دەرکردنی بڕیاری کاریگەر. سەرەڕای ئەوەی عێراق یەکێکە لە گەورەترین بەرهەمهێنەرانی نەوت لە جیهاندا، بەڵام نەیتوانیوە ئابوورییەکەی هەمەچەشن بکات یان کەرتی تایبەتی کاریگەر و کێبڕکێکار دروست بکات. پشتبەستنێکی زۆر بە داهاتی نەوت، لەگەڵ ناکارامەیی بیرۆکراتی، گەشەی ئابووریی وەستاندووە و بۆتە هۆکارێک لە بەرزبوونەوەی بێکاری و ناڕازیبوونی کۆمەڵایەتی.
فەیلی جەختی لەوە کردەوە کە عێراق دەبێت لەئاستی بەڕێوەبردنی قەیرانەکان تێپەڕێت و پلانی ئابووری درێژخایەن بگرێتەبەر. لەبری ئەوەی بەدوای سەرکەوتنی سیاسی کورتخایەندا بگەڕێن، پێویستە داڕێژەرانی سیاسەت سەرنجیان لەسەر پەروەردەکردنی ژینگەیەکی بازرگانی بەردەوام و کەمکردنەوەی بیرۆکراسی و وەبەرهێنان لە سەرمایەی مرۆیی بێت. بەڵام ئەم چاکسازییانە پێویستیان بە ئیرادەی سیاسی و ئیرادەی کۆمەڵگا و جێبەجێکردنی بەردەوامی یاسا هەیە- بوارێک کە عێراق هێشتا سەرکەتوو نەبوە تیایاندا.
ئایندەی سوریا
ململانێ درێژخایەنەکەی سوریا دامەزراوەکانی دەوڵەتی ڕووخاند و ملیۆنان کەسی ئاوارە کردو و ئابووری ئەو وڵاتەی وێران کرد. دکتۆر عەمار قەحف جەختی لەوە کردەوە کە سەقامگیری لە سوریا پێویستی بە کەم کردنەوەی دەستێوەردانی دەرەکیی و زیادکردنی هەوڵەکانی ئاشتەوایی ناوخۆیی هەیە. ڕێکخراوەکانی کۆمەڵگەی مەدەنی بۆشاییەکانی حوکمڕانییان لە ناوچەکانی ژێر دەسەڵاتی ئۆپۆزسیۆن پڕکردۆتەوە وخزمەتگوزارییە سەرەکییەکان لەو شوێنانەدا پێشکەش دەکەن کە حکومەتی سوری تێدا نیە. بەڵام ئەم ڕێکخراوانە سەرباری ئەمانەش، لە گفتوگۆ سیاسییە فەرمیەکاندا بە پەراوێز ماونەتەوە.
نەبوونی دیالۆگی نەتەوەیی یەکگرتوو ڕێگری لە درووستبونەوەی دۆخێکی سیاسی گشتگیر دەکات. دەستێوەردانی دەرەکی ئێران، ڕووسیا، تورکیا و ئەمریکا دۆخی حوکمڕانی ئاڵۆزتر دەکات لە کاتێکدا کە ئابووری وڵاتە لەوپەڕی خراپیدایە، ئەمەش ناسەقامگیری کۆمەڵایەتی قووڵتر دەکاتەوە. قەحف جەختی لەوە کردەوە کە کۆمەڵگەی مەدەنی سوریا دەبێت لە هەر چوارچێوەیەکی حوکمڕانی داهاتوودا یەکبخرێت و هۆشداریشیدا لەوەی کە دوورخستنەوەی ئەکتەرە سەرەکیکان تەنها دەبێتە هۆی درێژکردنەوەی ناسەقامگیری.
تەوەرێکی دیکە لە گفتوگۆکەدا ئەوە بوو کە ئایا عێراق، سوریا، ئوردن و لوبنان دەتوانن چوارچێوەیەکی ئابووری لەناوچەکە دابمەزرێنن؟ هیوا عوسمان پێشنیاری هاوپەیمانییەکی ئابوورییەکی کرد لە ڕۆژهەڵاتی ناوەڕاستی هاوشێوەی یەکێتی ئەوروپا، بەڵام لە کاتێکدا یەکگرتنی ئابووری خوازراوە، قسەکەران دانیان بەوەدا نا کە دابەشبوونە سیاسییەکان و نیگەرانییە ئەمنییەکان وەک بەربەستی سەرەکی لەبەردەم دروستبونی ئەم بیرۆکەیە دەمێننەوە. پێویستە سەرەتا عێراق و سوریا لە ناوخۆدا سەقامگیر بن پێش ئەوەی بەشداری دەستپێشخەرییە ناوچەییە فراوانترەکان بکەن.
چارەسەرە پێشنیازکراوەکان
لە چوارچێوەی ڕووبەڕووبوونەوەی ئەم تەحەددایانە، پانێلیستەكان کۆمەڵێک چارەسەری پێشنیارکراویان خستەڕوو کە دەكرێ لە گەیشتن بە سەقامگیری و خۆشگوزەرانی لە ناوچەکەدا بەكار بێن. جەختیشیان لە گرنگی پتەوکردنی متمانە لە نێوان گەلان و بڕیاردەران کردەوە، لە ڕێگەی دیالۆگ و پەیوەندیی بەردەوام و بنیاتنەر. هەروەها داوای چالاککردنی هاوکارییە ناوچەییەکانیان لە بوارە جیاجیاکان، بەتایبەتی ئابووری و ڕۆشنبیری، کرد لەڕێگەی دەستپێکردنی پڕۆژەی هاوبەش و بەرنامەی ئاڵوگۆڕکردن، کە گرنگن بۆ نزیککردنەوەی دیدگاکان و یەکخستنی هەوڵەکان. لە پێشنیازە کردەییەکاندا بیرۆکەی دامەزراندنی بۆری نەوت و گاز لە عێراقەوە لە ڕێگەی ئوردن یان سوریا و لوبنان و دروستکردنی ڕێگاوبان و هێڵی ئاسن بۆ ئاسانکاری بازرگانی و گەشتیاری و ئاڵوگۆڕکردنی سکۆلەرشیپ لە نێوان زانکۆکان.
کرانەوە وهاوکاری ئابووری وەک خاڵی دەستپێک بۆ سەقامگیری ناوچەیی دەستیشانکرا لەم پانێڵەدا. پڕۆژەی ژێرخانی گەورەی وەک بەندەری ئەلفاو لە عێراق و پڕۆژەی ڕێگای گەشەپێدان دەتوانن یارمەتیدەری ئابووری ناوچەیی بن. هاندانی ڕێککەوتنەکانی بازرگانی سنووربڕ دەتوانێت یارمەتیدەر بێت لە کەمکردنەوەی پشتبەستن بە لایەنە دەرەکییەکان، لە هەمان کاتدا وەبەرهێنان لە تەکنەلۆژیا و شەراکەتی دیجیتاڵی کۆمەڵە هۆکارێکن کە کارەیگەریان دەبێت لە بەمۆدیرنکردنی ئابووریی ودروستکردنی هەلی کارکردنی نوێ.
هەروەها پانێڵەکە تیشکی خستە سەر پێویستی بەپەلەی ئەنجامدانی چاکسازی لە حوکمڕانیدا بۆ بەرەنگاربوونەوەی گەندەڵی و پێشخستنی لێپرسینەوە و باشترکردنی خزمەتگوزارییە گشتیەکان. جەخت لەسەر بەرزکردنەوەی شەفافیەت لە خەرجییە گشتییەکان و کەمکردنەوەی بیرۆکراسی و جێبەجێکردنی یاسا بۆ کەمکردنەوەی گەندەڵی کرا. قسەکەران پێشنیاریان كرد كە کۆڕبەندی لێڤانت دەکرێیت دەستپێشخەرییەکی ناحکومی بێت و گرنگی بە ئاسانکاری گفتوگۆ لەسەر ئاستی گەلان و کۆمەڵگاکانی ناوچەکە و هاندانی هاوکاری ناوچەیی لەسەر پرسە ئابووری و کۆمەڵایەتییەکان، و پێشخستنی داڕشتنی سیاسەتێکی گشتگیر بۆ ناوچەکە، بکات.
گفتوگۆی پانێڵەکە بە ڕوونی باسی لەوە کرد کە سەقامگیری ناوچەیی و خۆشگوزەرانی ئابووری گەلانی ناوچەکە پێویستیان بە چاکسازیی ناوخۆیی و سەرکردایەتی پراگماتیک و چوارچێوەی دامەزراوەیی بەهێز هەیە. پێویستە سەقامگیری ئابووری لە پێشینەی ڕکابەرییە سیاسییەکان بێت. چاکسازی دامەزراوەیی پێویستە بۆ باشترکردنی حوکمڕانی، چونکە عێراق و سوریا دەبێت چارەسەری گەندەڵی و ناکارایی بیرۆکرسیەت بکەن بۆ گەیشتن بە حوکمڕانییەکی تۆکمە.
ڕۆڵی کۆمەڵگەی مەدەنی و دیالۆگ و مۆدێلە نێودەوڵەتییەکان
رەنگە دروستبوونی هاوپەیمانییەکی ئابووریی ناوچەیی فەرمی لە ماوەیەکی نزیکدا واقیعی نەبێت، بەڵام دەکرێت پەیتا پەیتا هاوکاری ناوچەیی ببێتە هۆی چاندنی تۆوی ئابۆریەکی بەهێزی تێکەڵکێش لەم ناوچەیە. بۆ ئەمەش کۆمەڵگەی مەدەنی دەبێت ڕۆڵێکی زیاتر بگێڕێت لە پرۆسە و گفتوگۆکانی حوکمڕانیدا، بەتایبەتی لە سوریا، چونکە لەوێ ئەکتەرە ناوخۆییەکان پێویستن بۆ دروستبوون و مانەوەی سەقامگیری درێژخایەن. بەشداربووان جەختیان لەو ڕۆڵە گرنگە کردەوە کە کۆمەڵگەی مەدەنی دەیگێڕێت لە بەدەستهێنانی گەشەپێدانی بەردەوام، لەڕێگەی بەشداریکردن لە داڕشتن و جێبەجێکردنی سیاسەتەکان و چاودێریکردنی ئەدای دامەزراوەکانی حکومەت، و پێشخستنی بەشداریکردنی کۆمەڵگا بە گشتی. کۆمەڵگای مەدەنی بە هاوبەشێکی سەرەکی لە پرۆسەی گەشەپێدان دادەنرێت، بەو پێیەی نوێنەرایەتی دەنگی خەڵک دەکات و ڕەنگدانەوەی خواست و پێداویستییەکانیانە. کۆمەڵگەی مەدەنی لە سوریا دەتوانێت بەشداری لە دەستپێشخەرییەکانی داهاتوودا بکات، هەرچەندە ئەزموونەکەی هێشتا لە سەرەتای گەشەکردندایە. هەر بۆیە پانێڵەکە جەختی لە گرنگی پشتگیریکردنی کۆمەڵگەی مەدەنی و فراوانکردنی پەیوەندی و هاوکاری نێوان کۆمەڵگاکان کردەوە.
هەر وەک لوقمان فەیلی ئاماژەی پێدا، “چارەسەرەکە لە ڕۆژئاواوە نایەت. مانەوەی ئێمە پەیوەستە بە توانای ئێمە بۆ بنیاتنانی خۆڕاگری ناوخۆیی و دروستکردنی هاوبەشی ناوچەیی.” لە کاتێکدا کە هاوئاهەنگی ناوچەیی پرۆسەیەکی ئاڵۆزە، پانێڵەکە جەختی لەوە کردەوە کە دەبێت پرۆسەی چاکسازیی ئابووری و کۆمەڵایەتی و حوکمڕانیی وەک پرۆسەیێکی ستراتیژی و قۆناخ بە قۆناخ هەبەت، ئەمەش ڕێگەچارەییە بەرەو سەقامگیری درێژخایەن لە ڕۆژهەڵاتی ناوەڕاستدا. لەم میانەشدا دیالۆگە وەک فاکتەری جەوهەری بۆ سەقامگیری دێتە پێشەوە. بەشداربووان جەختیان لە گرنگی گفتوگۆ و پەیوەندیی بەردەوام لە نێوان لایەنە پەیوەندیدارە جیاوازەکاندا کردەوە، بە مەبەستی گەیشتن بە کۆدەنگی لەسەر خزمەتکردنی بەرژەوەندی هەموو گەلانی ناوچەکە. بەشداربووان ئاماژەیان بە گرنگی دیالۆگ لەسەر ناوچەکە کرد، بە بەشداریی هەموو ئەکتەرەکان، بە تورکیاشەوە، لە پێناو بەدیهێنانی سەقامگیری لە ناوچەکەدا. هەروەها ئاماژەیان بە گرنگی گفتوگۆ لەگەڵ ئەمریکا کرد چونکە ئەمریکا ئەکتەرێکی کاریگەرە لە ناوچەکەدا. هەروەها جەخت کرایەوە کە دەبێ دیالۆگەکە هەموو لایەنەکان لەخۆ بگرێت، و ئامانجی گەیشتن بە سەقامگیری و باشترکردنی بارودۆخی ژیانی خەڵک بێت.
چەندین مۆدێلی سەرکەوتووی یەکگرتن هەیە کە دەتوانرێت وانەیان لێ وەربگیرێت. پانێڵەکە باسی ئەزموونە نێودەوڵەتییە جیاوازەکانی کرد، وەک ئەزموونی ئەڵمانیا لە یەکگرتنەوە لە دوای جەنگ و ئەزموونی ژاپۆن. خۆ دەکرێت سوود لەو ئەزموونانە وەر بگیرێت بە شێوەیەک کە لەگەڵ تایبەتمەندی ناوچەکەدا بگونجێن. گرنگی ئیرادەی سیاسی و کۆمەڵایەتی لە تێپەڕاندنی قەیرانەکاندا، هەر وەک لە ئەزموونی ئەڵمانیا لە تێکەڵکردنی بەشەکانی ڕۆژهەڵات و ڕۆژئاوای ئەڵمانیا بەدیکرا، جەختی لەسەر کرایەوە. هەروەها تیشک خرایە سەر ئەزموونی ئوردن لە پاراستنی سەقامگیری و ئەزموونی ئەمریکا لە پشتیوانیکردن لە تێگەڵکێشی کۆمەڵگا و لایەنە جیاوازەکان، کرا.
ئەنجام
گەیشتن بە سەقامگیری و خۆشگوزەرانی لەناوچەی شام و عێراق پێویستی بە هەوڵ وتەقەلای هاوبەش هەیە لەلایەن هەموو لایەنە پەیوەندیدارەکانەوە بۆ بەهێزکردنی متمانە و هاوکاری ناوچەیی، جێبەجێکردنی بنەماکانی حوکمڕانی باش، و گرتنەبەری ستراتیژییەکانی گەشەپێدانی بەردەوام. لە چوارچێوەی ئەمەشدا ڕۆڵی کۆمەڵگەی مەدەنی گرنگە لە گەیشتن بە گەشەسەندن و هەروەها لە بەشداریکردنی گەنجان لە داڕشتنی داهاتووی هەرێمدا. گرنگی گفتوگۆ و پەیوەندیکردن، سوودوەرگرتن لە ئەزموونە نێودەوڵەتییەکان و کارکردن لەسەر جێبەجێکردنی پڕۆژە ئابوورییە گەورەکان لە پێشخستنی گەشەپێدان و هاوکاریی ناوچەییدا بە گرنگ دەمێننەوە.
كۆڕبەندی لێڤانت و عێراق دەبێ ببێتە سەکۆیەکی پێویست بۆ بیرکردنەوە و کارکردنی بەکۆمەڵ، لە دەرەوەی ململانێکان، بۆ پاراستن و یەکخستنەوەی کۆمەڵگە جۆراوجۆرەکانی لێڤانت و عێراق، بە تایبەت پێكهاتە ئێتنۆ-ئاینییەکان.
دیداری مێری
30 ئۆكتۆبەری 2024
بۆ بینینی ڤیدیۆی پانێل
کۆڕبەندی لێڤانت و عێراق: پلاتفۆرمێک بۆ هاوکاری ناوچەیی