لە رۆژی چوارشەممەی ١٥/ ١/ ٢٠١٠، ئینستیتیوتی مێری مێزگردێكی تایبەتی رێكخست، سەبارەت بە ململانێی ئەمریکاو ئێران لەسەر خاکی عێراق و سیناریۆیەکانی ساڵی ٢٠٢٠، بە بەشداری بژاردەیەك لە داڕێژەرانی پۆڵەسی و ئەندامانی پەرلەمان و حكومەت و ڕێكخراوەکانی کۆمەڵگای مەدەنی و کەسانی ئەكادیمی لە هەرێمی کوردستان. لەو مێزگردەدا، چەند هەڵسەنگاندن و سیناریۆ و پێشنیازێک تاووتوێکران سەبارەت بە کاریگەری ململانێکانی ئەمریکا و ئێران و ڕووداوەکانی ئەو دواییانەی عێراق لەسەر هەرێمی کوردستان، هەڵوێستی هەرێم بۆ زیاتر خۆپاراستن لەو ململانێیانە، و ئەگەری دەرچوونی هێزەکانی ئەمریکا لە عێراق.
سیناریۆکان
یەکەم، سیناریۆی نە شەڕ و نە ئاشتی، وەیان شەڕی بە وەكالەت و یەكتر ماندوو كردن. ئەو سیناریۆیە زۆرترین چانسی پەیڕەوكردنی هەیە، ئەگەرچی مەترسی زۆریشی پێوەیە. ئەمساڵ ئەمەریكا ئابلۆقە و فشارەكان لەسەر ئێران توندتر دەكات تاوەكو باری ناو وڵاتەكە و نێوماڵی شیعەی عێراق و لایەنگرەکانی ئێران ناسەقامگیرتر بكات، بە جۆرێك كە ئەو یەكریزیەی پێشوویان نەمێنی. لە بەرامبەردا، ئێران لە هەوڵەكانی بۆ وەدەرنانی لەشكری ئەمەریكی لە عێراق بەردەوام دەبێ، جا لە رێگەی “شەڕپێفرۆشتن” و دروستکردنی کێشە بێ بە هۆی هاوپەیمانەكانی وەیان لەرێگەی پەرلەمان و حكومەتی عێراقی بێ.
دووەم، سیناریۆی ڕوودانی جەنگ بوونی هەیە، ئەگەرچی جارێ لاوازە. هەندێ چاودێر پێیان وایە كە ئێران بە دوای شەڕی رووبەڕووی پێشوەختەدا دەگەڕێ، ئەوەش وەك رێگایەك بۆ پاراستنی خودی رژێم لە راپەڕینی ناوەكی. بەڵام لە ماوەی رابوردوو ئێران ئەو دەرفەتەی هاتە پێش و نەیقۆستەوە. ئەوكات كەشێكی یەكڕیزی ناوەكی و نێو شیعەی عێراقی هاتە كایەوە و ئەمەریكیەكانیش هێشتا بەوە رانەگەیشتبوون جوولە بە هەموو هێزەكانیان بكەن و خۆیان بۆ شەڕی سەرتاسەری ئامادە بكەن. بەڵام دوور نیە ئێرانیەكان دوودڵ بووبن و پێیان باشتر بووبێ چەند مانگێك هەتا گەرمبوونی هەڵمەتی هەڵبژاردنی ئەمەریكی (لە بەهار تا پایزدا) چاوەڕێ بكەن. لەو نێوەشدا خۆشیان هەڵبژاردنی سەرۆكایەتی (لە شوبات) ئەنجام دەدەن. ئەوكات دوورنیە دۆناڵد ترەمپ ئامادەی سازش بێ.
سێیەم، زیادنەكردنی گرژیەكان و تۆزێك خاوكردنەوە. واتە هەردوو لایەنی ئەمەریكی و ئێرانی هەوڵدەن ساڵی (٢٠٢٠) بە سەلامەتی تێپەڕێنن هەتا پڕۆسەی هەڵبژاردن لە هەردوو وڵاتدا یەكلا دەبێتەوە. ئەگەر دیموكراتێكی وەك جۆو بایدن بووە سەرۆك كۆمار، ئەوا دوور نیە رێكەوتنە ئەتۆمیە كۆنەكە زیندوو بكاتەوە لەگەڵ ئەنجامدانی رێككەوتنێكی هاوتەریب سەبارەت بە سیستەمی ئایندەی رۆژهەڵاتی ناوەڕاست. خۆ ئەگەر ترەمپ دیسان هەڵبژێردرایەوە، ئەوا ئێرانیەكان دووچاری دوو ئەگەر دەبن، یان بەردەوامبوونی یاریەكە وەك ئێستا هەتا ڕادەی جەنگ، وەیان ترەمپ دەستپێشخەریەكی بێ پێشینە دەكات بۆ رێكەوتن. ئەو سیناریۆیەش چانسی لاوازە.
چوارەم سیناریۆ نموونەییەكە بریتیە لە دیالۆگێكی جیددی هەمەلایەنە بۆ گەیشتن بە ڕێكەوتنێكی ڕیشەیی لە هەموو ئاستێكی ململانێكاندا. لەم سیناریۆیەدا، ڕۆڵێكی گەورەتر بە بەڕیتانیا و ئەوڕوپاییەكان دەدرێت بۆ نێوەندگیری و هێنانی هەردوولا بۆ سەر مێزی گفتوگۆ. ئەوانە ڕەنگە بتوانن ئێران رازی بکەن بە دووبارە دەستپێکردنەوەی دانوستاندنی ئەتۆمی، وە ئەمریکا رازی بکەن بە هەڵگرتنی بەشێك لە فشار و ئابلۆقە ئابووریەكان، بەڵام پەیڕەوكردنی ئەو سیناریۆیە لە ساڵێ ٢٠٢٠ دا چانسی زۆر كەمە.
هەڵومەرجی سیاسی عێراق لە ئایندەدا
عێراقی پێش کوشتن و دوای کوشتنی هەردوو سەركردە، قاسم سولەیمانی و ئەبو مەهدی ئەلموهەندیس، گۆڕانکاری گەورەی بەخۆیەوە بینیوە، چونکە ئەوانە لە زۆربەی بڕیارە چارەنووسازەکانی ئەو وڵاتە بڕیاردەربوون. دیارە دوای نەمانی ئەو دوو سەركردەیە هێزە شیعەکان تووشی شلەژان هاتوون. ئەو هێزانە سەرەتا بڕیاری تۆڵەکردنەوەیان دا، بەڵام دوایی بۆیان بەدیارکەوت کە ئەمریکا سیاسەتەکانی گۆڕدراوە و بە تووندی بەرپەرچی هەر هێرشێک دەداتەوە، بە تایبەتی کە کوشتنی هاوڵاتی یان سەربازی ئەمریکی لێبکەوێتەوە. لە لایەکی دیکە حکومەتی عێراقی لاوازتر بووە و سەرچاوەکانی هێز ئاڵۆزتر و فراوانتر بوونە. لە ناو پەرلەمان تەواو هەست بە کوتلەکاری دەکرێت ئەوە جگە لە کوتلەی کورد و سوننە، بەڵام کوتلەی باڵادەست ئەو کوتلەیەیە کە لە ٥/١/٢٠٢٠ بڕیاری دەرکردنی هێزەکانی ئەمریکاو هاوپەینەکانیان دا. وا پێدەچێ لە داهاتووش هەر ئەوان بڕیاردەربن لە دانانی سەرۆک وەزیرانی نوێ.
بە گوێرەی لێکدانەوەکان واپێدەچێت ئێران ڕێگە نەدات هاوپەیمانەکانیان لە عێراق و لوبنان و سوریا هیچ عەمەلیاتێکی کوشتن دژ بە هێزەکانی ئەمریکا بکەن، ئەو هێرشەی سەر هێزەکانی ئەمریکا لە کەیوان باجەکەی بۆ ئێران زۆر گەورە بوو. بۆیە مەبەستیەتی زیاتر فشار لە ڕێگەی هێزی مرۆیی و خۆپیشاندانەوە بەکاربهێنێت بۆ دەرکردنی هێزەکانی ئەمریکا، بۆ نموونە، ئەو خۆپیشاندانەی کە موقتەدا سەدر و ئەو هێزانەی لە بەرەی ئێرانەوە نزیکن ئامادەکارییەکان بۆ دەکرد لە لە ٢٤/ ١/ ٢٠٢٠ لە بەغدا ئەنجام بدرێ.
سەبارەت بە خۆپیشاندەران، بە پێچەوانەی تێگەیشتنی باو، زیاتر بەرەو سەربەخۆ بوون و ڕێکخراو بوون دەچن. خۆپیشاندەران سەرکردەیان هەیە و نزیکەی سەد کەس لە شارە جیاوازەکانی عێراق سەرکردایەتی کارو چالاکی لۆجیستی خۆپیشاندەران دەکەن، و هەماهەنگیان لەگەڵ یەک هەیە، بەڵام بە ئاشکرا لە ترسی هەڕەشەی کوشتن کارەکانی خۆیان ناکەن. بۆیە دانوستان و گفتوگۆکردن لەگەڵ خۆپیشاندەران دەتوانرێ بکرێت.
پاراستنی بێلایەنی هەرێمی کوردستان لە ململانێکان
مووشەکەکانی ئێران بۆ سەر پێگەکانی ئەمریکا لە نێو پایتەختی هەرێمی کوردستان، ئاماژەیەکی ڕوونە کە هەرێمی کوردستان لەنێو جەرگەی ململێکان دایە، بۆیە بێلایەنی هەرێم لە نێو ئەو هەلومەرجە کارێکی ئاسان نیە، وە ڕووداوەکان دەریان خست کە فشارێکی زۆر هەیە لەسەر هەرێم بۆ ئەوەی کە هەڵوێستی هەبێت لەلایەن هێزە شیعەکان و ئێران، نموونە هەڵوێستی ناو پەرلەمانی عێراقی لە کاتی دەنگدان بە چوونە دەرەوەی هێزەکانی ئەمریکا، وە هاویشتنی چەند مووشەکێکی ئێرانی بۆ شاری هەولێر و دەورووبەری، ئەمە لەلایەک، لە لایەکی تر فشاری ئەمریکاو پەیوەندیە بەردەوامەکانیان لەگەل بڕیاردەرانی هەرێم بۆ پشتگیری ئەمریکا و نەچوونە پاڵ سیاسەتەکانی ئێران.
لە مێزگردەکەدا گرنگی هەبوونی گوتارێک بۆ خۆپیشاندەران باسی لێوە کرا. ئەو گوتارە گرنگە تا لەلایەن شەقامی عێراقی تێڕوانینی نێگەتیف بۆ پێگە و بەرژەوەندییەکانی هەرێم نەکرێت. لەسەر ئاستی عێراقیش چەند پرسیارێک پێویستە بکرێن: ئایا مانای”شەراکەتی’ سیاسی لە عێراق ماوە، ئایا لەمەدوا هەر یاسایەک کە لە ئەنجومەنی نوێنەرانی عێراق دەردەکرێت ڕۆلی کورد تیا دەبێت یان بە ‘تەوافوق’ دەردەچێت؟ ئایا پێویست ناکات چاو بە پەیوەندیەکان بخشێندرێتەوە لەگەڵ هێزە عێراقیەکان لە بەغدا؟
بۆ ئەوەی هەرێمی کوردستان بتوانێت خۆی لە ململانێکان بپارێزێت پێویستە ”کوردستانێكی بەهێزی” هەبێت. یەکێک لە بنەما سەرەکیەکانی کوردستانێکی بەهێز یەکڕێزی هێزە سیاسیەکان و پێکهاتەکانی هەرێمی کوردستانە. میکانیزمەکانی ئەو یەکڕێزیەش پێویستە لە کۆبوونەوە و قسە دەربچێت و بە کردار ئیشی بۆ بکرێت. گرینگترین ئەو میکانیزمانەش بە بۆچوونی بەشداربووان بریتین لە:
١- پێویستە حکومەتی هەرێم و هێزە سیاسیەکان خۆیان دەست بە جولە بکەن لە ڕووی لۆبی کردن و دیبلۆماسیەت، و ڕاگەیاندن، و سەردانی وڵاتان بکەن، هاوشێوەی ئەو وڵاتانەی کە بەرژەوەندیان لە خەتەردایە بۆ نموونە وڵاتی قەتەر. دانانی نوێنەرانی هەرێم بە جێگیری و بە شێوازی دامەزراوەیی لە وڵاتانی خاوەن بڕیار بە تایبەتی لە بەغدا، تەهران و واشنتۆن، بۆ ئەوەی بەردەوام ئاگاداری ڕووداوەکان بن و لە ڕاگەیاندنەکانی ئەو وڵاتانە بەشداری بکەن. هەندێ کۆبوونەوە لەسەر ئاستی سەرۆکایەتی هەرێم کراوە، بەڵام ئەوەندە بەس نیە. سەردانی بەردەوامی بەغدا زۆر گرنگە بۆ ڕوونکردنەوەی هەڵوێستی کوردی بە بێلایەنی.
٢- بەردەوامبوونی یەکدەنگی پێکهاتە سیاسیەکانی هەرێم و فراکسیۆنەکان کە جەخت لەسەر مانەوەی هێزە هاوپەیمانەکان لە عێراقدا دەکەن، چونکە لای هەموو لایەک ڕوونە کە یەکێ لە هۆکارە سەرەکییەکانی مانەوەی کوردستان تاکو ئێستا بە سەقامگیری بە هۆی پشتگیری ئەمریکا و هێزە نێودەوڵەتیەکانەوە بووە.
٣- پێویستە یەکڕێزی نیشتیمانی لە ڕێگای بەدامەزراوەییكردن ( موئەسەسات) بێتە كایەوە، بۆ نموونە بە دامەزراوەییکردنی هێزی پێشمەرگە و ئەمنی، ئابووری و نوێنەرایەتی و دیبلۆماسی و میدیا. یەکڕێزی تەنها لە ئاستی سەرەوە بەس نیە، بەڵکو یەکرێزی تەواو لەناو کۆمەڵگا بەدەست دەهێندرێ، ئەویش پێویستی بە بەهێزبوونی دامەزراوەکانە، وە هێزیش هەر لەوەدایە، ئەوەی تا ئێستا دەکرێت لەلایەن حکومەتی هەرێم زیاتر لە ژێر فشاردا کراوە و ناچار بووە کە بڕیار بدات، نەک بە ڕێکخراوەیی و ئامادەکاری. کۆمەڵگای نێودەوڵەتی بەردەوام گلەیی لە هەرێم لەسەر ئەو نا یەکڕێزیە و نا موئەسسەتیانە دەکەنەوە. هەرچەندە مانای یەکڕێزی ئەوە نیە کە هەموو هێزەکان یەک خیتابیان هەبێت، بەڵام لایەنی کەم ڕوو بەدەرەوە یەک بۆچوونمان هەبێت.
سەردەم گۆڕاوە، ئەمڕۆ دونیا زیاتر بەرەو ئەوە دەڕوات کە هێز تێیدا باڵا دەستە، مەسەلەی سەروەری یاسا و مافی مرۆڤ ئەو رۆڵەی نەماوە. جەمسەری هێزی نوێی جۆراوجۆر لە دونیا سەری هەڵداوە، ئەمریکا بە تەنیا لە هاوکێشەکاندا نییە. تێگەیشتن لەو گۆڕانکارییانە بێ یەکڕێزی ناوەکی ناکرێت.
٤- پێویستە لە کاتی بڕیاردان بە هێمنی بڕیاربدرێ و هەرێم تووشی پەرچەکردار نەبێتەوە. لە وانەیە هەندێ جار لایەنەکان شتێک بۆ هەرێم دروست بکەن و بە پلان سەر لە هێزە سیاسیەکانی هەرێم بشێوێنن بۆ ئەوەی بێلایەنی لەدەست بدەن و ببن بە لایەنگیر، بۆ نموونە لێدوانی ئەو دواییەی حەسەن نەسروللە دەربارەی هەرێم.
٥- هەموو کات بە دامەزراوەییکردن کارێکی پێویستە و دەبێ پرۆسەیەکی بەردەوام بێت، بەڵام ئێستا پێویستی بە کرداری هەنووکەیی هەیە، بۆیە دەبێ تیمێکی ئەساسی هەبێ لە نێوان حیزب و حکومەت و ئەوانەی دەسەڵاتی کوردستانیان بەدەستە لە کەسانی سیاسی و سەربازی و ئەمنی، و بەردەوام لە ژوورێکی عەمەلیات بە یەکەوە ئیش بکەن. وە قەراری ئەو تیمە یەکخستنی قەراری کوردستانی بێت و وەک یەک تیم کاربکەن و بڕیار بدەن لە بەرانبەر هەموو گۆڕانکارییە لە ناکاو و خێراکان.
کاریگەرییەکانی دەرچوونی هێزەکانی ئەمریکا و هاوپەیمانان لەسەر عێراق و هەرێم
لە مێزگردەکەدا، بەڕوونی باس لەوەکرا کە کشانەوەی ئەمریکا لە ناوچەکە و عێراق بابەتێکی ستراتیژی و گرنگە بۆ کوردستان، وە چوونە دەرەوەی ئەمریکا لەو کات و ساتە خەتەرێکی زۆر گەورەیە لەسەر عێراق و بەتایبەتی لەسەر کوردستان. ئەگەرچی لە ڕووی لێکدانەوە ‘لۆژیکییەکانەوە’ ڕەنگە وا دەرنەکەوێ کە ئەمریکا لە ناوچەکە بکشێتەوە، بەڵام گرنگە فاکتەری ناوخۆی ئەمریکا و خودی کەسایەتی سەرۆکی ئەمریکا و کاریگەری لەسەر بڕیارێکی لەو شێوەیە لەبەرچاوبگیردرێ، بۆ نموونە کشانەوەی هێزەکانی ئەمریکا لەسەردەمی سەرۆک ئۆباما کە لە بەرژەوەندی هەڵبژاردنەوەی خۆی بەکاری هێنا.
ئەگەر ئەمریکا لە عێراق بکشێتەوە ئەوا لە کوردستانیش دەڕوات، چونکە چ بە یاسای خۆیان لە ئەمریکا، یان بە یاسای نێودەوڵەتی کە لە عێراق بڕوات، دەبێت لە کوردستانیش بڕوات. وە ئەگەر ئێران بتوانێت لە بەغدا تەنگ بە ئەمەریكا هەڵبچنێت ئەوا لە کوردستانیش دەتوانێت بیکات. و بە دڵنیایی ئەو کشانەوەیە نەک تەنیا کاریگەری لەسەر هەرێمی کوردستان دەبێ، بەڵکو ئەندازیاریی ئاسایشی ناوچەکە دەشێوێت. بۆیە کاربەدەستانی هەرێم دەبێ هەوڵ بدەن ڕێبگرن لە دەرچوونی هێزە ئەمریکیەکان لە عێراق. لەبەرئەوە ئەبێ بیر لە میکانیزمەکان بکرێتەوە، لەوانە سەردانی بەغدا و کاریگەریدانان لەسەر بڕیاری ئەوێ، یان پەرلەمانی کوردستان هەندێ یاسا دەربکا کە شەرعیەت بە مانەوە بدات. لەلایەن بەشداربووانەوە ئەم چەند میکانیزمە خرانەڕوو:
١- هەرێم دەبێ دانوستان و گفتوگۆ لەگەڵ دەسەڵات و هێزە عێراقییەکان بکات، وە رەچاوی ئەو میکانیزمانە بكات كە دەبنە هۆی زیاتر سەقامگیری و ئاسایشی هەموو پێکهاتەکانی عێراق، نەوەک تاکلایەنە بڕیار لەسەر بابەتێکی ستراتیژی وەها گرنگدا بدرێ.
٢- بۆ ڕێگرتن لە کشانەوەی هێزەکانی ئەمریکا دەکرێ سوود لە بڕیاری ٦٨٨ وەربگیرێ. هەروەها بابەتی سەرچاوەکانی ووزە کە لە هەرێمی کوردستاندا هەن دەتواندرێ بەکار بهێندرێ و سوودی لێببیندرێ، یان سوود لە ڕێکەوتنە ئەمنیەکان ببیندرێ لەگەڵ ئەمریکیەکان.
٣- پێویستە باس لە خوێندنەوە بکرێت نەک پێشبینی، واتە خوێندنەوەی مەترسی لەسەر ئاسایشی هەرێمی کوردستان، دەبێ هەرێم ئاگادار بێت کە حەشدی شەعبی بە شێوازێکی ڕێکخراو کاردەکات، هەلومەرجەکە ئاسان نیە. لە کاتی تێکچوونی پەیوەندییەکانی نێوان هەولێر و بەغدا لەسەر پرسی مانەوەی هێزەکانی ئەمریکا لە عیراق، ئاساییە هەلومەرجی دوای ڕیفراندۆم دووبارە ببێتەوە، عێراق وڵاتێکی دانپێندراوە لە کاتی ڕیفراندۆم هەموو دەوڵەتەکان پابەند بوون بە یاسا نێودەوڵەتیەکان، بۆ نموونە ڕاگرتنی گەشتە نێودەوڵەتییەکان بۆ فڕۆکەخانەکانی هەرێم. لێرەدا هاوکێشەیەکی گرنگ هەیە، سوننە خەریکی ئەوەیە بگەڕێنەوە سەر دەسەڵات، تورکیا و و ڵاتانی کەنداو پشتگیری هێزی سوننە دەکەن لە ناو حەشدی شەعبی، بۆیە دەبێت حیساب بۆ بەهێزبوونی هێزی سوونەکانیش بکرێت.
٤- سوودوەرگرتن لە بریارەکانی دادگای ئیتیحادی، چونکە مانەوەی هێزە ئەمریکیەکان بەیاسا کراوە و دەبێت بەیاساش هەڵوەشێتەوە.
٥- کشانەوەی هێزەکانی ئەمریکا ئەگەرێکی دوورە، تا ئێستا ئەمریکا ٤٣٨٤ کوژراوی داوە، ٣٢١٨٠ برینداری هەیە،هەرچی چەکی عێراقە ئەمریکیە، دەیان گرێبەست لە نێوان ئەمریکا و عێراق دا هەیە لە بواری چەک و چاککردنەوەی چەک.
٦- هۆکاری سەرەکی مانەوەی ئەمریکا لە عێراق هەبوونی داعشە، بۆیە دەکرێت هەرێمی کوردستان ئەوە ڕوون بکاتەوە کە داعش لە ناوچەی شیعە نشین دا نیە، بەڵکو لە ناوچە سوننە نشین و کوردەکان دا هێشتا مەترسییەکی گەورەیە.
دەرەنجام:
تێگەیشتنێکی هاوبەش لە نێوان بەشداربووانی مێزگردەکەدا هەبوو بەوەی کە لە ڕووی ستراتیژییەوە هەرێم دەبێ بەردەوام بێ لە سیاسەتی ”هاوسەنگی ڕاگرتن” لە نێوان هێزە هەرێمایەتی و نێودەوڵەتییەکان، هەرچەند دوای زیاتربوونی ئاڵۆزی و ململانێکانی ئەمریکا و ئێران هێشتنەوەی ئەو سیاسەتە زەحمەتتر بووە. لەگەڵ ئەوەش، ئاسایش و سەقامگیری کوردستان پێویستی بە مانەوەی هێزەکانی ئەمریکا و هاوپەیمانان هەیە بۆ ڕووبەڕووبوونەوەی مەترسییەکانی تیرۆر و مەترسییەکانی ئایندە. پرسێکی چارەنووسسازی ئاوا ناکرێ لە بەغداوە بە تەنیا بێ گفتوگۆکردن لەگەڵ پێکهاتەکان بڕیاری لەسەر بدرێ، هەرێم پێویستە تواناکانی خۆی کۆبکاتەوە و بەکاربهێنێ تا میکانیزمێکی هاوبەش لە نێوان واشنتۆن و بەغدا و هەولێر بدۆزرێتەوە، کە ئایندەی هێزەکانی ئەمریکا لە عێراق، و لەوەش گرنگتر پەیوەندی نێوان ئەمریکا و عێراق بە جۆرێک بێ کە بەرژەوەندییەکانی کوردستانی تیادا پارێزراو بێت. گۆڕانکارییەکان هێندە خێرا و لە ناکاون، دەکرێ لە دەرەوەی لێکدانەوە عەقلانییەکانەوە بێت، هەرێم دەبێ خۆی بۆ خراپترین بارودۆخ ئامادە بکات.
لیستی ئامادەبووان:
- ئانۆ جەوهەر عبدالمسیح عبدوکا، وەزیری گواستنەوەو گەیاندن
ایدن معروف، وەزیری هەرێم
جەبار یاوەر، ئەمیداری گشتی لە وەزارەتی پێشمەرگە
خلیل ابراهیم محمد، ئەندامی سەركردایەتی یەكگرتووی ئیسلامی کوردستان
کاروان گەزنەیی، ئەندامی پەرلەمانی کوردستان
نەوزاد هادی، راوێژکار، سەرۆکایەتی هەرێم
زریان رۆژهەڵاتی، بەرێوەبەری ناوەندی لێکۆلینەوەی رووداو
سعد خالد، حزبی زەحمەتکێشان
سعدی احمد پیرە، ئەندامی ئەنجوومەنی باڵای یەکیتی نیشتیمانی کوردستان
سیروان بابان، راوێژکار، سەرۆکایەتی هەرێم
سەردار عزیز، راوێژکاری پەرلەمان
شوان داودی، پەرلەمانتاری پێشوو
طارق جوهر عولا، راوێژکار لە پەرلەمانی کوردستان
عبدالکریم خسرۆ، فەرمانگەی هەمانهەنگی و بە دواداچون
عثمان احمد محمد، مامۆستا، زانکۆی صلاح الدین
ئاشتی عبدالعزیز، چالاکوان
عیدو باباشیخ، پەرلەمانتاری پێشوو
عەلی کوردستانی، پەیوەندیە گشتیەکانن ناوەندی لێکۆلینەوەی رووداو
فلاح مصطفی راوێژکاری باڵا، سەرۆکایەتی هەرێم
فواد احمد، سەنتەری توێژینەوەی پەرلەمانی کوردستان
کاردۆ محمد پیرداود، یەکێتی پەرلەمانتاران
هیوا عوسمان، رۆژنامەنووس
دلاوەر عەلائەدین، سەرۆکی ئینستیتیوتی مێری
فواد سمایل، بەڕێوەبەری کارگێری، مێری
کامەران محمد، توێژەر، ئینستیتیوتی مێری
کریستن پێری، توێژەر، ئینستیتیوتی مێری - محمد ابوبکر عثمان، بەڕێوەبەری ئایتی، ئینستیتیوتی مێری